М-Си-Эс электроникс компани 2000 онд Монголд анх удаа Аpollo, Venus нэртэй компьютеруудыг угсран, 2004 онд Олимпийн наадмыг угтан илүү өндөр хүчин чадал, найдвартай ажиллагаа бүхий Аthena брэндийн компьютер гаргаж байсан бол компьютер угсралтын чиглэлээр хуримтлуулсан 9 жилийн туршлага, ур чадвартаа түшиглэн 2009 онд Монголд анх удаа бүрэн автоматжуулсан үйлдвэрт, олон улсын стандартад нийцсэн угсралтын технологиор Могул брэндийн компьютерийг үйлдвэрлэхэд бэлэн боллоо. Компьютерийг стандарт горимын дагуу угсарч, эд ангиудын хоорондох зохицлыг зөв тохируулах нь цаашид компьютерийн найдвартай, бүрэн хүчин чадлаараа ажиллах нөхцөлийг бүрдүүлдэг. Дэлхийн алдартай брэнд компьютерүүд чанар чансаа, техник үзүүлэлт, хийц загвараараа хэрэглэгчдэд танигдаж чадсаны гол нууц нь үйлдвэрлэлийн процесс бүртээ технологийн горимыг хатуу баримталж, эд ангиуд хоорондын нийцлийг лабораторид байнга туршиж судалдагт оршдог. М-Си-Эс Электроникс компани дэлхийн хөгжлийн энэхүү чиг хандлагаас үл хоцрон, Монголд анх удаа олон улсын стандартын шаардлагыг хангасан, бүрэн автомат компьютерийн үйлдвэрийг ашиглалтад оруулсан нь Монголын хэрэглэгчдэд чанарын өндөр стандарт хангасан үндэсний брэнд комьютерийг хэрэглэх боломж бүрдэж байна. Могул брэндийн үйлдвэрлэлийн давуу тал нь Угсралтын бүх процесс бүрэн автоматжуулагдсан, Чанарын хяналт бүхий технологийн горимтой, Компьютер бүрийг 24 цагийн турш тестлэх лабораторитой, Стандартын шаардлага хангасан үйлдвэрийн барилга байгууламжтай, Хүний хүчин зүйлээс хамаарсан алдаа дутагдал гарахгүйд оршино. Өөрөөр хэлбэл олон улсын стандартад бүрэн нийцсэн бүтээгдэхүүн үйлдвэрлэн гаргах юм. Үйлдвэр өдөрт 100 компьютер, жилд 26000 гаруй компьютер угсрах хүчин чадалтай ажээ. М-Си-Эс Электроникс компанийнхан Могул брэндийг үйлдвэрлэснээр Шилдэг хөрөнгө оруулагч болоод зогсохгүй, Монголын мэдээлэл технологийн салбарт түүхэн шинэ хуудсыг нээнэ гэдэгт итгэлтэй байна. |
